Hagspá Hagdeildar ASÍ fyrir árin 2007 og 2008 gerir ráð fyrir að við lok núverandi stóriðjuframkvæmda nái hagkerfið mjúkri lendingu sem felur í sér að ekki verður harkalegur samdráttur þó verulega hægi á. Aðlögunin að jafnvægi er hins vegar alls ekki sársaukalaus því kaupmáttur margra dregst saman og gjaldþrotum fjölgar. Á árinu 2007 verður hagvöxtur lítill og atvinnuleysi eykst. Þá mun gengið veikjast, stýrivextir lækka samhliða lækkandi verðbólgu og draga úr viðskiptahallanum.

Spáin gerir ráð fyrir að hagkerfið verði fljótt að jafna sig. Strax á árinu 2008 verður hagvöxtur ágætur, verðbólga hófleg, stýrivextir lægri og gengið stöðugra. Samkvæmt spánni nær hagkerfið jafnvægi á árinu 2008 eftir mikið ójafnvægi liðinna ára.